Umdlali omusha weRichards Bay uSiyethemba Sithebe ubonga ithuba lokuphefumula kuleliqembu elingenayo ingcindezi abebhekene nayo kwiKaizer Chiefs kumasizini amathathu adlule.

USithebe umenyezelwe kanye nabanye abadlali abayisihlanu kwiBay okukhona kubo uKeegan Allan, Thabiso Kutumela, Tlakusani Mthethwa, Sbani Mntungwa noFezile Gcaba. 

USithebe uthi ukhakhayi seluqinile njengoba efunde ukumelana nengcindezi kwiChiefs. Lomdlali uzithwese nejoka lokucathulisa abadlali abasebancane, abakhombise indlela.

“Ngisuka eqenjini elikhulu. Sengidlale isikhathi eside kuPSL, ingcindezi ngiyijwayele, ngizomelana nobunzima njengoba sengifike eqenjini elisha. 

“Seyehlile ingcindezi manje, abadlali abasebancane bazobukela kubadlali abanesipiliyoni. Abadlali abasayinile bazolisiza iqembu ngesipiliyoni. Ngifika nesipiliyoni engizosidlulisela kubadlali abasebancane.

“Kubalulekile ukujwayela eqenjini elisha uma ungumdlali. Bekudlalwa ngendlela ehlukile kuMaZulu nakwiChiefs. Ngizozama ukuzimisela, ngibuyise izinga lami lakudala. Ngizosiza iqembu lizinze kwiligi, lifeze nezifiso ezibekiwe,” kubeka uSithebe ekhuluma nabezindaba emcimbini wokwethulwa kwabaxhasi iPhakwe Gas nabadlali.

USithebe uthi uchayise amaqembu ejoyina iNatal Rich Boyz. 

“Ngesikhathi ngidedelwa yiChiefs, ngikhulume nemenenja yami (Sihlangu Sithebe) ngifuna ukubheka amanye amaqembu abengifuna.

“Ngikhethe ukusayina neBay ngoba iseduze nasekhaya futhi ingibekele imali engcono kunamanye amaqembu. Ngisondele nomndeni wami ngoba sengisayine kwiRichards Bay.

“Angizisoli ngesikhathi engisihlale kwiChiefs. Iqembu lithatha isinqumo ngomdlali uma sekuphele inkontileka yakho,” kubeka uSithebe.