Umgadli weMamelodi Sundowns uPeter Shalulile uthi akumjabulisi ukugeja irekhodi likaCollins Mbesuma kodwa usezimisele ngokushaya amagoli angu-26 ngesizini ezayo.
UShalulile uqede isizini ka-2021/22 enamagoli angu-23 ngemuva kokushaya igoli elilodwa bebhekene neRoyal AM emdlalweni wokugcina eChartsworth Stadium ngoMsombuluko.
Ekhuluma nabeSupersport TV sekuphele umdlalo, uShalulile uthe ufuna ukushaya amagoli angu-26 ngesizini ka-2022/23.
“Ngiyabonga kuMdali, ozakwethu, ithimba labaqeqeshi nabanye abakhona eqenjini. Izinto zenzeka ngesizathu, yingakho ngingaliphulanga irekhodi. Ngonyaka ozayo ngizoshaya amagoli amaningi, ngiyabonga kubalandeli ngokweseka iqembu kulonyaka, bayamangalisa impela.
Angigculisekile, ngizoqhubeka nokulwa. Ngifuna amagoli angu-26, omakhonya benza kanjalo,” kubeka uShalulile.
UMbesuma washaya amagoli angu-25 ngesizini ka-2004/05 esadlalela iKaizer Chiefs.
Likhona irekhodi eliphulwe uShalulile ngegoli alishaye eChartsworth. Udlule uWilfred Mugeyi owashaya amagoli angu-22 esadlalela iBush Bucs. Endaweni yesine kukhona inkakha uPollen Ndlanya owashaya amagoli angu-21 kwiGlamour Boys.