Umqeqeshi we-Orlando Pirates uJose Riveiro ukholwa ukuthi baligqamise ngendlela efanele iqembu ekhempini ebibanjelwe eSpain emasontweni adlule.
IPirates ivalelise ngenduku eSpain ihlulwa yi-Al Saad ngo 3-2 kowokungcweka ngoLwesihlanu. Kweminye imidlalo, iBucs ihlule iSevilla ngo 2-1, yadlala ngokulingana ibhekene nePlymouth Argyle neGranada.
URiveiro uthi bebelwela ukuyinqoba yonke imidlalo.
“Ngijabule ngohambo lwethu. Bekungelula ngoba besibhekene namaqembu aqinile. Sizamile ukuyinqoba yonke imidlalo ngoba besifukuzela ukugqamisa iqembu nesitayela sethu. Abadlali bakwazile ukugqamisa iqembu.
“Abadlali abasikhohlwanga isitayela sethu siyiqembu kuyo yonke imidlalo esiyidlalile. Bekungenzeki kuxabane abadlali ekhempini. Besijima, siphumule ngokwanele ukuze sizolungela umdlalo olandelayo. Besiqhuba umsebenzi nsukuzonke, sizobuyela eGoli siyiqembu elingcono,” kuchaza uRiveiro ecashunwa abeSuperSport TV.
IPirates itheleke eNingizimu Afrika ngeSonto njengoba izokwethula ijezi elisha ngoMsombuluko.
URiveiro uthi bazomelana nobunzima bokudlala kwimiqhudelwano emihlanu ngesizini ka-2024/25. IBucs izobhanqa iligi neMTN 8, CAF Champions League, Nedbank Cup neCarling Knockout Cup.
“Ikhempu ikwazile ukusiza ngokubuyisa izinga labadlali esikhathini esincane. Sizojima kakhulu ukuze sizobuyisa izinga lethu. Kubalulekile ukuzikhandla ejimini ngoba kunesikhathi esizayo lapho sizodlala khona imidlalo esondelene eduzane.
“Imidlalo isondelene ngo-Agasti ngoba kukhona neyeChampions League. Sikucijele ukuqala kwesizini,” kubeka uRiveiro.