Sphamandla Gumede
Umqeqeshi weCape Town City uJan Olde Riekerink uncome ukuqinisela kwabadlali bakhe njengethuluzi elibasize bashaya iMamelodi Sundowns emdlalweni weligi izolo ebusuku.
ICity ijabulise amaqembu asembangweni wesicoco seligi ishaya ompetha be-Absa Premiership iDowns ngo 3-2 eLoftus Versfeld.
USurprise Ralani ushaye amagoli amabili ngeziwombe ezahlukene, elinye lavalelwa enethini umgadli uKermit Erasmus ngomzuzu ka-43. Amagoli eDowns ashaywe uWayne Arendse noKeletso Makgalwa ngokuhlukana kweziwombe.
“Ngiyaziqhenya ngeqembu, ngijabulela nabalandeli bethu baseKapa. Ngiyajabula kakhulu ngokunqoba kwethu namuhla. Umdlalo asiwuqalanga kahle, ikakhulukazi ngesiwombe sokuqala. Sishiye izikhala enkundleni. Sinabo abadlali abakwaziyo ukusebenzisa izikhala. Sikwazile ukusebenzisa izikhala ezishiywe iSundowns enkundleni. Umdlalo besiwuphethe ezikhathini eziningi,” kubeka uRiekerink ecashunwa abeSuperSport TV ngemuva komdlalo.
ICity ikhuphukele endaweni yesikhombisa kwiligi, yazibekisela ethubeni lokuqeda ikwi-top 8. ICity ibinqoba umdlalo wesibili kulandelana kwiligi njengoba ishaye iChippa United ngo 1-0 ngesonto eledlule.
“Sisebenzise uFagrie Lakay noRalani ezinhlakeni ngoba besifuna ukusebenzisa izikhala ezishiywe iDowns futhi sidinga umdlali ozogijima ngemuva kwezitobha. Besidlala esandleni sesokunxele kakhulu ngoba amathuba abevela khona. Abantu abangasibukeli phansi, lona Bekuwumdlalo wethu wesibili ezinsukwini ezine. Umqondo usebenze kakhulu ukudlula umzimba. Ngibachazelile abadlali ukuthi bazokhathala ngokuhamba kwesikhathi futhi bazohlulwa kweminye imidlalo,” kuchaza uRiekerink.