Sanele Dlamini

Uzidonsele amanzi ngomsele uphrojusa womculo weHouse osanda kuhlabana ngendondo kumaSouth African Music Awards uPrince Kaybee egexeka abebeshayela ihlombe owayeyisoka likaZodwa Wabantu ngezindaba zakamuva ezivelile ngaye.

UZodwa Wabantu muva nje usanda kuphumela obala esola uVusi ngokumqola imali noma engacacisanga ukuthi ukwenze kanjani lokhu. Uveze ukuthi usebenzise igama lakhe ukuthola imoto kwa-Audi muva nje waphinde waveza nokuthi kunento ethile eyaziwa yibo bobabili afuna ayibuyise.

Okuvezwe uZodwa kwenze abanye abantu bamshayela ihlombe uVusi ngokuzwisa uZodwa umuthi ovame ukuphuziswa abantu besilisa abakhulile uma sebehlukene nabantu besifazane abancane kunabo. Indlela ashayelwe ngaye ihlombe kuze kwaqalwa ihashtag ethi #vusiforpresident.

Ephawula kulolu daba uPrince Kaybee uyigxekile le hashtag wathi kunento engalungile ngabantu bakuleli uma kubajabulisa ukubona ubudlelwano babanye bungapheli kahle.