Umqeqeshi weKaizer Chiefs uNasreddine Nabi uthi abenzanga okwanele ukukhombisa ukuthi bekubafanele ukunqoba umdlalo wabo neChippa United ophele ngo 0-0.
IChiefs iphinde yahluleka ukunqoba imidlalo kulandelana njengoba abaningi bebenethemba lokuthi izophinde iwine ngemuva kokuyibona ikhiphe iMamelodi Sundowns kwiNedbank Cup.
Kwiligi iChiefs ilokhe ikhuphuka ngonyawo lonwabu kumaphuzu njengoba inawu-31 ngemuva kwemidlalo ewu-25. Isele nemidlalo emithathu kule sizini ukuqinisekisa ukuthi iqeda kwitop 8 kwiligi.
“Bekuwumdlalo onzima uma ngikhuluma iqiniso. Bekungasifanele ukunqoba lo mdlalo,” kusho uNabi ngemuva komdlalo ekhuluma nabeSuperSport TV.
“Ngokubona kwami besingekho kulo mdlalo ngokomqondo. Kumele uzinikele u100% ulwe uma ufuna ukunqoba umdlalo, asikukhombisanga lokho namhlanje.
“Ngeke ngikhulume ngomdlali ngamunye, siyiqembu, ngakho ke njengeqembu sisonke asidlalanga kahle namhlanje, asidlalanga ngendlela esidlale ngayo sibhekene neSundowns ngesonto eledlule. Ngisho ngabe kuthiwa siwavalelile amanye amathuba amaphuzu amathathu abengasifanele”