UThendo Mukumela ungomunye wabadlali abasha abazomenyezelwa AmaZulu kulelisonto ngokwesithembiso sikaMengameli weqembu uSandile Zungu.
UMukumela useshiyile kwiCape Town Spurs edlala kwiGladAfrica Championship njengoba esezoba yingxenye yoSuthu oluphekwa uBrandon Truter.
UMukumela (24) ubeyingxenye yeqembu lesizwe elidlale kuma-Olympic Games abebanjelwe eTokyo, Japan ngonyaka odlule. Udlale kuyona yonke imidlalo yamaqoqo amaGlug-Glug eshaywa iJapan, Mexico neFrance.
Lomdlali unikezwe ibhande likakaputeni kwiSpurs ekuqaleni kwesizini ka-2021/22 ngemuva kokubhuntsha kwezingxoxo namaqembu akuDSTV Premiership ayemgaqele.
Ngesonto eledlule, uZungu watshela u-Andile Ncube kwiSports Nights Amplified ukuthi ezakhe zizomemezela abadlali abasha maphakathi nalelisonto.
AmaZulu achithe abadlali abangu-15 ngesonto eledlule, okukhona uSiyethemba Sithebe ojoyine iKaizer Chiefs, uTapelo Xoki osayine ne-Orlando Pirates.