Intatheli yezemidlalo

Umdlali we-Orlando Pirates uThabiso Monyane ukholwa ukuthi ukudlala ezindaweni eziningi yikhona okuzomnikeza indawo eqenjini le-Under 23 elizodlala kuma-Olympics azobanjelwa eJapan ngoJulayi.

UMonyane ubebiziwe ekhempini yeqembu lika-Under 23 ebiseThekwini, washaya ngisho negoli bedlala neMaritzburg United emdlalweni wobungani.

UMonyane (20), owayengumgadli waba ngumdlali wasemuva eshintshwa umqeqeshi uMilutin Sredojevic, uthi uyayithakasela indawo yakhe entsha yize esabonakale emidlalweni emine kulesizini.

“Sengikujwayele ukudlala emuva. Ngifundile izinto okumele uzijwayeze uma udlala emuva ophondweni. Ukudlala izindawo eziningi yinto engiyibona iyisikhali. Kuhle ukukwazi ukudlala izindawo eziningi. Ngiyawazi amagalelo ami njengomdlali. Ngishaye igoli ngidlala emuva, lokho kumele kukubonise ukuthi ngiyakwazi ukwenza umehluko njengomdlali wasemuva,” kuchaza uMonyane ecashunwa abeSowetan.

UMonyane uthi akumphathi kabi ukweqiwa yijezi eMayfair.

“Ngiyakholwa ukuthi njengoba ngikwazi ukudlala izindawo eziningi, lokho kuzonginyusela amathuba okuqokwa esikwatini sama-Olympics. Ngiyazi ukuthi kumele ngisebenze kanzima. Angiphathekile kabi njengoba ngingalitholi ijezi kulesizini. Ngizophakamisa ikhanda, ngiqhubeke ngisebenze kanzima. Kumele ngiqinise ukhakhayi. Ngiwumuntu ohlezi enethemba,” kuchaza uMonyane