Intatheli Yezemidlalo
Isibabuli somdlali weLiverpool uMohamed Salah sithi asimbambele gqubu ukapteni weReal Madrid uSergio Ramos, owamlimaza bebhekene kumdlalo wamanqamu e-Eufa Champions League ngo-2018.
ILiverpool neReal Madrid bazobhekana emdlalweni wamaquarter-final kwi-UCL ngesonto elizayo ngoLwesibili. Ekhuluma nezintatheli ngemuva kokudlalela i-Egypt ngempelasonto uSalah uthe usewulindele ngabomvu lo mdlalo kodwa akasacabangi ngomdlalo abashaywa kuwo ngo 3 -1, kodwa unalo ugqozi lokuzibuyiselela izinduku.
“Asithi nje nginolunye ugqozi lokudlulela kuma semi-final kulokhu, noma kungenzekani ngeke usaguquka umphumela esawuthola phambilini eKiev (2018). Sengakudlulisa,” kusho uSalah.
Abalandeli abaningi beLiverpool babesho ukumudla ephila ezinkundleni zokuxhumana uRamos ngemuva kwalo mdlalo, bemsola ngokuba nesandla ekudliweni kwabo njengoba alimaza uSalah. Nase-Egypt abafuni nakuyizwa indaba kaRamos njengoba nabo besola yena ngokubhacaza kwe-Egypt kwi-AFCON.
Lo mdlali useshayele iLiverpool amagoli awu-119 kumasizini amane kanti ngesikhathi ebuzwa ukuthi uyazibona yini edlala eSpain uphendule wathi kuzobonakala, wangayichitha imibiko emhlanganisa nezimbangi zeLa Liga iBarcelona neReal Madrid.