Umqeqeshi weMamelodi Sundowns uManqoba Mngqithi uthi ukusebenza kusakhanya emakethe okwenziwayo yizimbangi ezinkulu iKaizer Chiefs ne-Orlando Pirates kuzoshubisa umbango weligi.
IChiefs imatasa kulezinsuku iqinisa isikwati sayo ezogadla ngaso ngesizini ezayo. Isiqedile ngokusayinisa uZitha Kwinika kwiStellenbosch noSiyethemba Sithebe kuMaZulu. Sekuphinde kwavela ukuthi sebeqala izingxoxo neStellenbosch ngomgadli u-Ashley Du Preez.
IChiefs isiphinde yaqala izingxoxo noRyan Baartman weCape Town All Stars.
Nayo iPirates ayizibekike phansi, isiqedile ngesivumelwano nesitobha soSuthu uTapelo Xoki.
UMngqithi uthi engakujabulela ukuncintisana nezimbangi.
“Ibhola alisafani manje ngoba iChiefs nePirates abaqinile njengakudala. Indlela abasayinise ngayo iyakhombisa ukuthi bayabuyela ezingeni labo lokuncintisana.
Ukungena kwePirates kowamanqamu weCAF Confederations Cup kukhombisa ngokusobala ukuthi bayiqembu eliqinile elingakwazi ukudlala namaqembu amakhulu. Akubukeki kahle uma kuyiSundowns kuphela emele izwe, okwamanje angifuni ujuyicabanga indaba yokuthi yithina omakhonya bebhola eNingizimu Afrika.
Akufanele sehlise igiya, sizobone sesiphumelele ngoba lamaqembu a nomlando omkhulu. Ibhola liyagingqika, manje seligingqikela ngakithi, kufanele sithathe lelithuba ngezandla zombili, siqinisekise ukuthi siqhubekela phambili.
IPirates neChiefs bazobuya ngenye isizini, angifuni ukubhekana naleso simo,” kusho uMngqithi.