Ukungenelwa amagoli ayisithupha emidlalweni emithathu eyedlule kushiya imibuzo kumqeqeshi weMamelodi Sundowns uManqoba Mngqithi.
Ompetha beligi iSundowns bazofuna ukuqeda ishobolo lokudedela amagoli alula uma sebedlala neMarumo Gallants kowamanqamu weNedbank Cup ngoMgqibelo eRoyal Bafokeng Stadium. Umdlalo uzoqala ngehora lesithupha.
ISundowns ingenelwe amagoli amathathu idlala neKaizer Chiefs, Stellenbosch FC neRoyal AM.
“Kuyangithusa kakhulu, ikakhulukazi amagoli amathathu esiwadedele kwiStellenbosch. Angijabule ngamagoli angena ngoba ayeqhamuka ngendlela okwakufanele siyiqaphele. Sayibheka indlela abashaya ngayo amagoli.
Angeke ngikhulume ngegoli elangena sibhekene neChiefs. IRoyal AM iyawashaya amagoli. Kwakufanele simake kangcono kulamagoli ashaywa yiRoyal AM. Asifuni ukungenelwa amagoli amaningi, lokho kusiphatha kabi,” kubeka uMngqithi.
UMngqithi ubone abadlali basesiswini beGallants abayingozi abangahlupha iSundowns. Ukhombe uNdabayithethwa Ndlondlo, Miguel Timm noCelimpilo Ngema.
“Umdlalo weSundowns neqembu eliqeqeshwa uDan Dance uhlezi ushubile, kuyahlaselwa. Alikho iqembu elipaka ibhasi, libambe umoya. UDan Dance unabadlali abathathu ababalulekile okuyibo abadlalisa iqembu.
Kukhona uMiguel onganconywa kakhulu kwiligi ngoba uyayishaya indishi. Kukhona uNdlondlo engimkhonze kakhulu. Uyashintsha emdlalweni, ufaka ingcindezi, uphasa kahle futhi namagoli uyawashaya.
Kukhona noCelimpilo, bambiza ngoZizou ngoba uhlakaniphile kakhulu, uyashesha futhi uyakwazi ukubona izikhala,” kubeka uMngqithi.