Ungqongqoshe wezemidlalo kuleli uGayton Mckenzie ugcine ehlulekile ukusigcina isithembiso asenza sokuthi uzoqinisekisa ukuthi kuyaqala ukusetshenziswa kobuchwepheshe beVideo Assistant Referee (VAR) kwiPSL ngenyanga edlule.
UMcKenzie wafunga wagomela ukuthi buyeza lobu buchwepheshe waze wabeka inyanga ka-April njengenyanga abathandi bebhola abazoqala ukubona iVAR isebenza kuleli.
Njengoba sesinyangeni kaMay, ungqongqoshe uswele umgodi wokucasha ngokuhluleka wukugcina isithembiso sakhe. Kunokuthi acacise bha ukuthi yini ebambezele, uMcKenzie ushiye isitatimende esinomoya wokuthi ‘zifundele kwezakho’.
Ngosuku lokugcina ku-April 2025, ubhale kanje emakhasini akhe ezinkundleni zokuxhumana: “Sizosifeza isithembiso sethu ngeVAR. Imali isikhona, nabantu sebeqalile ukufaka isicelo [zokuhlinzeka iSAFA ngobuchwepheshe]. IFIFA ithi konke kumele kwenziwe neSAFA. Sesiqalile ukuvivinya ubuchwephe sibambisene nabakwaSuperSport. Sezenziwe izinhlelo zokuqeqeshwa konompempe.”
Uma sizifundela ‘kwezethu’ – nakhu esikutholayo ngesitatimende sikaMcKenzie.
- Bahlulekile ukuletha iVAR ngo-April njengoba ayethembisile
- Empeleni uthi konke kusezandleni zeSAFA manje, ngamanye amazwi iyona esibambezele lolu hlelo
- Alukaqali noma alukaphothulwa uhlelo lokuqeqesha oreferee ukuthi bakwazi ukusebenzisa iVAR
UMcKenzie wake wakuveza ukuthi enye yezinto ezizobadalela inkinga ngalobu buchwepheshe wukuthi buzodla imali enhle. Ubuchwepheshe beVAR buzobiza imali ebalelwa kuR80 million ukuze bufakwe ezinkundleni, bese kubiza uR70,000 umdlalo ngamanye ukuthi setshenziswe. Lokhu kusho ukuthi iVAR izobiza uR16 million ngesizini kwimidlalo yeligi nje iyodwa.
Ngenxa yezinto okusamele zenziwe, silindele ukuthi iVAR iyoze iqale ukusebenza ngesizini ezayo ka-2025/2026.