Owayengumqeqeshi weBafana Bafana uShakes Mashaba ubehamba phambili eyingxenye yenhlangano ebizwa ngeGauteng Masters and Legends ebelibhekise amabombo emahhovisini eSAFA House, behambisa incwadi yezikhalazo ebhekiswe kwiFIFA.
Babalelwa ku-1200 abantu abajoyine lemashi enokuthula ebiphelezelwa amaphoyisa.
UMashaba, onguSihlalo weGaueng Masters and Legends, ubephelezelwa izishoshovu asebenze nazo bezifikela qathatha eSAFA House. Balibeke ngembaba elokuthi incwadi yabo ayamukelwe umsebenzi weFIFA.
UMashaba ugcine emtholile umsebenzi weFIFA uDavid Fani bakhuluma ocingweni. Yize engatholakalanga uFani emahhovisini, incwadi yezikhalazo yamukelwe oyisikhulu uLydia Monyepao.
Lenhlangano ibifuna ukuthi izinkakha zeBafana zitholelwe umsebenzi ezinhlakeni zeSAFA. Inhlangano iphinde yabuza ngodaba Luka-R20.8 million okhokhelwe izikhulu ezisekomidini eliphezulu kwiSAFA.
“Ngiyamukelile incwadi ebhekiswe kwiFIFA ngemuva kokukhuluma noDavid Fani. Incwadi iqhamuka kwiSAMLFA ekhuluma ngezikhalazo eziningi. SiyiSAFA, sinelungelo lokwamukela lencwadi ebhekiswe kwiFIFA, siqinisekise ukuthi iyafika ezandleni ezifanele,” kuchaza uMonyepao.
Owayeyisikhulu kwiSAFA uDennis Mumble ubekhona kulemashi.
“Ngifikile ngizoxhasa izinkakha zeBafana ezifuna ukunakwa iSAFA. Banelungelo lokufaka izikhalazo ngoba sebeqede iminyaka elishumi kwiLFA ukuze bezovunyelwa ukufaka imibono kwiSAFA.
Kufanele sibalalele, hhayi ngoba bezoqokelwa amalungu eNEC kodwa bengafakwa emakomidini lapho bezosiza khona ngokukhulisa ibhola lethu,” kubeka uMumble.