Umqeqeshi weMaritzburg United uJohn Maduka unethezekile ngabadlali abasha asebengene khaxa esitayeleni seqembu.
UMaduka ubekhuluma ngemuva kwesimemezelo seqembu lisayinisa uSiboniso Conco, Tshidiso Monamodi noBrian Hlongwa. UMaduka uthi ukudlala imidlalo yesihle eminingi kuzosiza abadlali basheshe bajwayelane.
“Kancane isikwati siyabumbeka ngendlela engiyifunayo, okungigqugquzelayo ukuthi abadlali sebengene khaxa esitayeleni seqembu.
Sihlele imidlalo yesihle eminingi emasontweni amabili alandelayo njengoba sesilungiselela isizini entsha. Imidlalo yesihle izonikeza abadlali ithuba lokusheshe bajwayele ukudlala ndawonye ukuze sizoqala isizini ngenothi eliphezulu,” kubeka uMaduka esitatimendeni esikhishwe yiqembu.
Esitatimendeni seqembu, kubhalwe ukuthi labadlali basayine inkontileka zeminyaka emibili neTeam of Choice.
“Bobathathu basayine izinkontileka zeminyaka emibili neTeam of Choice, sibasayinise emaqenjini azinze KwaZulu-Natal iGolden Arrows, Royal AM noThongathi FC.
UConco (26) uzokwengeza kubadlali baphambili abazosetshenziswa umqeqeshi uMaduka. Uyakwazi ukudlala ezimpondweni. UMonamodi ubesebenzisana noMaduka kwiRoyal AM, uzoqinisa emuva.
UHlongwa uzidonsele amehlo eTeam of Choice ngokuzimisela kwakhe kuThongathi edlala kuNFD. UHlongwa uzoqinisa odongeni lwasemuva,” kuchaza isitatimende.
IMaritzburg ilungiselela iKwaZulu-Natal Premier’s Cup ekupheleni kwenyanga kaJulayi.