Umgadli we-Orlando Pirates uZakhele Lepasa ubona ikusasa elikhanya bha kuzakwabo odlalela iqembu leDSTV Diski Challenge (DDC) uBoitumelo Radiopane.

URadiopane ungomunye wabadlali abahlomulile kwimiklomelo ebihlelwe iPremier Soccer League (PSL) ngeSonto ebusuku.

Uqokwe njengomdlali ovelele kwiDSTV Diski Challenge, waphinde wanqoba indondo yomshayimagoli ohamba phambili kwiDDC. URadiopane (19) uvalele enethini amagoli angu-24 emidlalweni kwiDiski Challenge.

Lomgadli uhlabane ngengqayizivele yethuba ethola isikimu emdlalweni weCarling Cup nezimbangi iKaizer Chiefs. ULepasa uthi ubona uRadiopane efana naye ngezindlela eziningi.

“ULepasa ungikhumbuza mina ngisadlala kwiCastle League. Nami ngangishaya amagoli amane emdlalweni. Yena ukwenza kwiDDC lokho, ngijwayele ukumtshela ukuthi angafinyelela ngisho phesheya kwezilwandle uma ekholelwa ebholeni lakhe.

Nami ngangifuna ukuya phesheya isikhathi sisavuma, ngimbona enethuba lokuyodlala e-Europe esamncane ngokweminyaka,” kuchaza uLepasa ecashunwa abeFARPost.

Ayishayi eceleni inkulumo kaLepasa kwazise omunye umgadli owayedlala kwiBucs uLyle Forster walibangisa e-Europe eneminyaka engu-18.