Uqweqwe lomqeqeshi uClinton Larsen uthi uzoqhubeka nokusebenza kwiSummerfield Dynamos ngesizini ka-2022 /23 njengoba esafuna ukuyifaka kuGladAfrica Championship.

Leliqembu laKwaZulu-Natal likhishwe esigabeni samaqoqo kumaPlay-Offs e-ABC Motsepe League ngoLwesine. AmaPlay-offs ahlunga amaqembu amabili azodlala kwiGladAfrica Championship.

ULarsen ujoyine iSummerfiled ekuqaleni kwesizini ka-2021/22. Izindaba zokujoyina kwakhe zithuse abantu abaningi kwazise usebuya kwiDSTV Premiership nePolokwane City, Maritzburg United, Chippa United neBloemfontein Celtic.

“Ngizohlala kwiDynamos. Leliqembu alifanelwe ukudlala kwi-ABC Motsepe League, ngikukhulumile lokhu ngaphambilini. Sizokwenza konke okusemandleni ukuze sizobuya ngesizini ezayo, sizozama futhi,” kubeka uLarsen ngemuva komdlalo ngoLwesine.

EzikaLarsen zishaywe iNorth West University ngo 3-1, okuwumphumela oshabalalise amathemba okunyukela esigabeni esiphezulu.

Emdlalweni wokuqala, iDynamos yangenelwa yigoli ngomzuzu wokugcina ibhekene neBayern FC. Umdlalo waphela zibambene ngo 1-1.

Ihlandla lesibili iqembu lifinyelela kumaPlay-Offs, sizophinde sizame ukufeza iphupho likaSihlalo. Angeke sicashe ngesithupha, sihlulekile ukudlala,” kubeka lomqeqeshi.