Umqeqeshi weMamelodi Sundowns uSteve Komphela usevikele uLyle Lakay obesolwa ngokubhacaza emdlalweni wokuhlungela i-AFCON 2023 ngoLwesine.

ULakay ushaye udaka iBafana ihlulwa iMorocco ngo 2-1 eRabat izolo ebusuku.

Ubebhekene nesikhwishikhwishi sePSG u-Achraf Hakimi, ongomunye wabadlali basemuva kwesokudla abahlonishwayo e-Europe.

IMorocco ibidlala ezimpondweni, ithembele kakhulu kuHakimi onejubane iphinde abe muhle ekugobeni ibhola elifaka ebhokisini. UHakimi ubelokhi efike njalo kuLakay, edlule kalula, agobe amabhola kuhluleke bona abagadli bangakubo.

Abathandi bebhola baseNingizimu Afrika bebekhala ngoLakay obehluleka ukubhula umlilo obufika noHakimi ophondweni lwesokunxele.

UKomphela uthe nabadlali abahlonishwayo emhlabeni abayibamba emuva ophondweni lwesokunxele bebengeke bekwazi ukumelana nengcindezi ebifakwa iMorocco.

“ULyle ubebhekene nabadlali abathathu, uHakimi, Barkok, Chair, ungambala no-Amallah. Akekho umdlali ongavimba abadlali abathathu eyedwa.

Ukushintshana kwabadlali abathathu ophondweni lukaLakay bekunzima ukuthi kuvimbeke. Umdlali wasemuva ophondweni, umdlali wasesiswini nomdlali waphambili ophondweni bebeshintshana endaweni kaLakay.

Uyivimba kanjani ingcindezi enjalo? Kufanele uvimbe ingcindezi ngokwandisa isibalo sabadlali kuleyondawo. ULyle ubedinga usizo.

UDavies, Robertson, Shaw, Mendy nabanye abadlali abayibamba kwesokunxele emuva bebezohluleka ukumaka abantu abathathu. Ngicela nimxolele uLakay, lokhu kwenzeka sidlala neFrance,” kubhala uKomphela kuTwitter.

Ebuzwa ngezinga eliphezulu elikhonjiswe uKhuliso Mudau ophondweni lwesokudla, uKomphela uthe akufanele kuqhathaniswe.

“Uma ubukela umdlalo, bobabili labadlali ababhekene nengcindezi efanayo. Akufanele sibaqhathanise,” kubhala uKomphela.