Umdlali weMamelodi Sundowns u-Andile Jali usephawule ngokunqoba izindebe ezintathu neqembu ngesizini ka-2021/22.
UGattuso uphinde wahlabana ngemiklomelo emithathu kumaPSL Awards.
UJali (32) ubegxekwa nxazonke ebuya eBelgium,abanye bekhala ngokuboza nokuzimuka komzimba. UJali uhlale iminyaka emine eBelgium neKV Oostende.
Udlale ibhola elinenkosi phakathi ngesizini ephelile, ebonakala emidlalweni engu–40 kumaBrazilians. Usize iqembu lanqoba iMTN 8, DSTV Premiership neNedbank Cup.
Ukhomekiswe ngezindondo ezintathu zomdlali ovelele kwiMTN 8, kwiDSTV Premiership neNedbank Cup.
“Ngiyajabula ngokunikezwa imiklomelo ngenxa yokuzimisela kwami eqenjini. Bengingeke nginqobe lemiklomelo ngaphandle kozakwethu nabaqeqeshi.
Silwe ngamandla kuyona yonke imiqhudelwano. Ngiyaziqhenya ngokuba yingxenye yomlando weSundowns.
Kuyaphoqa ukunyusa izinga eqenjini elifana neSundowns. Kubalulekile ukukhuphula izinga lomzimba ngoba miningi imidlalo esiyidlalayo,” kubeka uJali ecashunwa iphephabhuku leqembu.