Umqeqeshi weBafana Bafana uHugo Broos usephinde wazivikela kwimibuzo ngokushiywa ngaphandle kukaThemba Zwane no-Andile Jali esikwatini esizodlala neMorocco emdlalweni wokuhlungela i-AFCON yango-2023.
UBroos uphinde wabashiya ngaphandle labadlali beMamelodi Sundowns yize beqokelwe kwimiklomelo ephezulu yePremier Soccer League (PSL) njengoba sekuphele isizini.
UBroos uthi ukudlala kwiCAF Champions League akuchazi ukuthi udlala ibhola elisezingeni eliphezulu, ubona ibhola lase-Europe liseqophelweni elingcono kakhulu.
Ekhuluma nabeSABC Sport, uBroos ubeke kanje.
“Okokuqala abadlali ezwenikazi elikhulu, badlala kwiCAF Champions League. Kunomehluko ukubukela i-UEFA Champions League. Akufani ukubuka umdlalo phakathi kweBayern neVillareal kunokubukela iPretoria leyo (Petro de Luanda) idlala neSundowns. Umehluko uyabonakala.
Umdlalo weBafana uhlukile ezingeni leCAF. KwiBafana usuke ubhekene nabadlali base-Europe. Abadlali base-Europe badlala ibhola elihluke kakhulu.
Angeke ukwenze konke. Abekho baningi abadlali base-Europe abakhona esikwatini engisibizile. Lokho akulungile ngokwebhola laseNingizimu Afrika. Asinabo abadlali abagijima e-Europe. Amaqembu esibhekene nawo ahlome ngabadlali abasuka e-Europe, Umzekelo iMorocco,” kubeka uBroos.
Lomqeqeshi wenze Umzekelo ngesinqumo asithatha so kushiya ngaphandle uNjabulo Ngcobo esikwatini sakhe yize wayeqokwe njengesitobha esivelele kwiDSTV Premiership.
“Ngicela ungangizwa kabi. Ngesikhathi ngiqala ukuqoka isikwati, abantu babuza ukuthi kungani engabizwanga uNjabulo Ngcobo. Uyena isitobha esihamba phambili, kodwa wayengadlali kwiChiefs.
Unganaki ukuthi UJali uqokelwe kwimiklomelo emihlanu nokuthi uZwane usenqobe ziphi izindebe. Ngiyababukela labo badlali nami. Namanje ngisasho ukuthi ngiyaxolisa ngokungababizi UJali noZwane,” kubeka lomqeqeshi.