UDaniel Cardoso uthi engakujabulela ukujoyina i-Orlando Pirates uma ikhombisa ukuzimisela ngaye.
UCardoso (33) ungomunye wabadlali abachithwe yiKaizer Chiefs emasontweni amabili adlule. Lomdlali oyibamba emuva uthi akayiboni inkinga ngokujoyina iBucs uma kuvela ithuba.
UCardoso ujika nelanga okwamanje, umagange ngokuthola iqembu elisha. UCardoso ubeke kanje ekhuluma ohlelweni iMarawa Sports Worldwide.
“Anginakinga nokujoyina iPirates, ibhola liyibhizinisi manje. Lokho kuzonginikeza ithuba lokudlala kwiSoweto Derby. Yiwona umdlalo omkhulu ezweni, ungeminye yemidlalo emikhulu emhlabeni.
Ngingakujabulela ukujoyina iPirates uma izimisele ngokungisayinisa. Ngimbonile uBrilliant Khuzwayo osuke kwiChiefs, waya kwiPirates. Baningi abadlali abashintshe lamaqembu aseSoweto.
Nakanjani ngingayicabanga iPirates, angeke ngilinqabe ithuba selifikile emnyango wami,” kubeka uCardoso.
UCardoso uhlale iminyaka eyisikhombisa eNaturena, wadlala emidlalweni engu-202.
Ushiye kwiChiefs engakaze aqukule indebe yize befinyelele emidlalweni yamanqamu amahlandla amaningi, ikakhulukazi iCAF Champions League.