Umdlali weKaizer Chiefs uRamahlwe Mphahlele ufikelwa izinsuku zakudala esaqala ukudlala kwiDSTV Premiership njengoba bezohambela e-Emirates Airline Park ukuyobhekana neSekhukhune United ngoMgqibelo.
Lenkundla, eyayidume ngele-Ellis Park eminyakeni eyedlule, yagqamisa uMphahlele emdlalweni wakhe wokuqala kwiPremier Soccer League eneminyaka engu-18. UMphahlele wayesadlalela iMoroka Swallows.
“Nginemicabango emihle nge-Ellis Park. Ngaqala ukudlala e-Ellis Park. Kwaba umdlalo wami wokuqala kwiSwallows sibhekene ne-Orlando Pirates ebusuku. Yayiphethe izihlabani iPirates kuleso sikhathi. Kwakukhona uGift Leremi, Excellent Walaza noBenedict Vilakazi.
Ngangifunda ibanga leshumi (Grade 10) ngesizini ka-2006/07, ngangisemncane kakhulu. Lendawo iyisipesheli kakhulu. Sanqoba ngo 1-0 kulowomdlalo. Ngikhumbula kahle, ngikulangazelele ngabomvu ukubuyela kulenkundla,” kubeka uMphahlele ecashunwa i-website yeqembu.
Kulomdlalo, uMphahlele wagoba ibhola elavalelwa enethini uCecil Oerson, yamuka namaphuzu amathathu iDube Birds.
UMphahlele uthi usewulindele ngabomvu umdlalo weSekhukhune, bafuna nokuqeda isizini ngenothi eliphezulu.
“Izinto zihamba kahle ejimini, silungiselela iSekhukhune. Sihleli le siqedile, sifuna ukubuya nomphumela ogculisayo e-Ellis Park. Kunzima ukudlala neSekhukhune. Badlala kahle, kufanele siqine ukuze sizothola amaphuzu agcwele,” kuchaza lomdlali.
UMphahlele uthi ulindele ubunzima kwiBabina Noko egabe ngezinsephe.
“Badlala ngezinsephe, iqembu labo liqinile. Bayagijima, kufanele siqinise umgqigqo, sigijime ukudlula bona. Bazofuna ukusifakela ingcindezi ngoba badlala ekhaya. Kukhona uWillard Katsande owazi iChiefs ukusuka nokuhlala. Siyazethemba ngokunqoba lomdlalo.
Kulesizini izihlelo zethu zinyomfekile. Sikwazile ukubuyela ezingeni esilijwayele emidlalweni emibili eyedlule,” kubeka uMphahlele.