Kwajabula iningi labalandeli beKaizer Chiefs ngesikhathi iqembu liqinisekisa ukuxoshwa kukamqeqeshi uStuart Baxter ngo-Ephreli.
IChiefs yakhishwa iTS Galaxy kwiNedbank Cup, yaphinde yabhacaza kwiDSTV Premiership njengoba uBaxter waxoshwa is ihleli endaweni yesihlanu.
UBaxter wahamba kungasekuhle eNaturena kwazise nabalandeli base bemthuka enkundleni, befuna axoshwe. Lezigameko zenzeka ngemuva komdlalo weligi iChiefs ishaywa iSuperSport ngo 1-0. Ngesonto elilandelayo, izinyawo zagcwala udaka kuBaxter.
Izehlakalo zaseFNB zazingafani neze nangesikhathi uBaxter ehola iqembu ngo-2012 kuya ku-2015. Amakhosi anqoba izindebe ezine nezicoco zeligi ezimbili.
Ekhuluma nabeSABC Sport, uBaxter uthi wayebona iqembu lingaqeda isizini lisendaweni yesine kwiligi. Lomqeqeshi uchaze ngokubuyela kwakhe kwiChiefs.
“Umlando wami neChiefs uyikhethelo. Ngiwubeke enhliziyweni yami. Imicabango yami neChiefs ibimihle, igcwele injabulo, ukugqugquzeleka nokulwela ibheji leqembu. Benginobudlelwano obuhle nabalandeli, nabadlali esengike ngasebenza nabo. Kubalulekile ukuthi ngikhulume lokho. Yingakho ngakhetha ukubuya. Kunzima ukubuyela endaweni oseke wasebenza kuyona ngaphambilini.
Ngesikhathi ngibuya, benginalo ulwazi ngezinto ezenzakalayo. Benghazi ukuthi kwenzakaleni eqenjini ngisho ngisajoyina okokuqala. Benginalo lonke ulwazi engiludingayo ngeqembu,” kuchaza uBaxter.
Lomqeqeshi uthi wabuya kwiChiefs ngoba enethemba lokuthi uzonikezwa isikhathi sokulungisa izinto yize kwakuhlasele iCovid nesigwebo seFIFA sokungathezi emakethe.
“Isizathu sesibili esangenza ngakhetha ukubuya yingoba ngangifuna ukulungisa izinto eqenjini. Konke okwaxoxwa phakathi kwami neChiefs kwangenza ngakholelwa ekutheni izinto zizolunga. Bengazi ngomsebenzi ongihlalele, akusikho ukuthi ngisola abaqeqeshi ngokubhacaza. Iqembu belibhekene nesigwebo seFIFA, kanye necovid-19.
Zaziningi izinkinga. Ngangingazi noma kufanele ngisayinise abadlali noma ngibakhuphule kwinkulisa, okanye ngiqale ibhola elisha. Ngazibuza ukuthi kudingeka luphi ushintsho ukuze iqembu lizophumelela. Uma Izinhloso zakho zingaphumeleli, vele awujabuli. Bengingathanda ukuhlala kwiChiefs, ngibone ukuthi ngingafinyelela kuphi. Kodwa nesimo saba bucayi kakhulu kimina neqembu,” kuchaza uBaxter.
Lomqeqeshi uthi wayefuna ukubeka iqembu ngemuva kweMamelodi Sundowns esicongweni, okuyindawo eyayizobafaka kwiChampions League.
“Savumelana ngokuthi ngikhululwe eqenjini. Kubuhlungu lokho ngoba ngikusho. Bengifisa ukuqhubeka ngoba besinethuba lokungena endaweni yesibili. Ngiphatheka kabi uma ngibona ukuthi asifikanga endaweni yesibili. Izinto zajika endleleni. Akwenzekanga ngendlela engangifisa ngayo,” kusho lomqeqeshi.
IChiefs isalelwe imidlalo emibili kwiligi. Izoqala neSekhukhune ngoMgqibelo, ilandele ngeSwallows ngomhlaka 21 kuMeyi 2021.