Umqeqeshi weStellenbosch FC uSteve Barker usole umqeqeshi weKaizer Chiefs uNasreddine Nabi nethimba lakhe ngokuphazamisa umdlalo wayizolo esiwombeni sesibili ukuze baqinisekise ukuthi bathola amaphuzu amathathu.
IChiefs ishaye iStellies ngo 2-1 koweBetway Premiership ngoLwesithathu, yakhuphukela kunombolo 5 kwilog.
Amakhosi anqobe ngamagoli amabili avalelwe wuWandile Duba ngemuva kwegoli elibeke iStellies phambili ngomzuzu ka-20.
Ekhuluma ngemuva komdlao uBarker uthe ezakhe zizamile ukubuya kulo mdlalo ngemuva kwegoli lesibili likaDuba elingene ngomzuzu ka-57 kodwa kwangenzeka ngenxa yamaqhinga abaqeqeshi beChiefs.
“Siwuqale kahle umdlalo. Sithole igoli ebelisifanele ngenxa yendlela esidlale ngayo kwimizuzu engu-20 yokuqala. Benze izinguquko, okubenze baqeda isiwombe sokuqala kangcono kunathi…bathole igoli lokulinganisa nge-corner, besingenza kangcono kuyo.
“Ngemuva kwegoli labo lesibili sizamile ukubuya emdlalweni…ngeshwa imizuzu engu-15/20 umdlalo ubulokhe uphazamiseka, abadlali bekhala ngokulimala, behlisa umgqigqo wethu, kuningi nje obekwenzeka obekusiphazamiza.
“Abaqeqeshi beChiefs bexove umdlalo ukuze bezokwazi ukuqinisekisa ukuthi babuya namaphuzu aphelele.”
UBarker uqhube wathi akaboni ukuthi iChiefs ibizokwazi ukukora ukube abawenzanga amaphutha kulo mdlalo.