Sphamandla Gumede
Umqeqeshi weMamelodi Sundowns uRhulani Mokoena uthi bazolwela isidima seNingizimu Afrika uma sebetholana ne-Al Hilal Omdurman yaseSudan ngoLwesihlanu eKhartoum.
UMokwena usho lamagama nje igama elithi ‘Sudan’ lisagaya izibozi ezinhliziyweni zabalandeli baseMzansi.
ISudan ishaye iBafana ngo 2-0 ngeSonto, yazibekisela ngendawo kwi-AFCON 2022, iBafana yona yasala ilambatha.
I-Al Hilal izogadla ngeningi labadlali abekade bekhona esikwatini seSudan esenze ezibukwayo ngempelasonto.
“Umdlalo we-Al Hilal ubalulekile kakhulu. Ubalulekile ezweni lonke ukudlula thina siyiqembu. Kunzima kakhulu uma ubheka izinto ezenzeke ezinsukwini ezedlule. Silimele. Siphatheke kabi siyisizwe esimeni sebhola lezinyawo. Siyalithanda ibhola, abalandeli baphoxekile ngokuhlulwa kweBafana. ISudan isiziswe ubuhlungu obunzima,” kuchaza uMokoena.
ISundowns yanqoba ngo 2-0 emdlalweni womzuliswano wokuqala eLoftus Stadium. IDowns isivele idlulele kuma-quarterfinals eChampions League, kunjalo nje isabambe irekhodi lemidlalo engu-26 ingahlulwa.
“Thina kumele siqinisekise ukuthi sidlalela abalandeli bezwe, sibuyise injabulo emehlweni abo ngokunqoba eSudan. Sifuna ukubuyisa ukuzigqaja kwethu. Sizobakhombisa ukuthi siyisizwe esiqinile ebholeni, leli yithuba lokuthi sikhombise ukuthi iSundowns iyiqembu elikhulu e-Afrika, lokho kubalulekile,” kubeka uMokwena.
Inkundla okudlalele kuyo iBafana neSudan ibingekho esimeni esilungile, okuholele ekutheni kushintshwe inkundla kanye nesikhathi somdlalo.
“Iqiniso ukuthi inkundla ayikho esimeni esihle. Asibona onjiniyela kodwa imibiko iveza ukuthi ukukhanya enkundleni akulungile, sabona emdlalweni weBafana ukuthi inkundla yayikhanya kancane kwelinye icala. Kufanele ukuthi umdlalo uhlehliselwe kwenye inkundla uma izinto zingekho esimeni esihle,” kubeka uMokoena.