Owayengumqeqeshi wonozinti kuMaZulu uMoeneeb Josephs usola abaphathi beqembu ngokugagamela ngamaphupho nezifiso zeqembu.
AmaZulu, aholwa uMengameli uSandile Zungu, athathe izinqumo ezingqala ezithuse abaningi ezinsukwini ezedlule.
Leliqembu liqale ngokuxosha umqeqeshi uBenni McCarthy, kwalandela nethimba abesebenza nalo okukhona kulo uJosephs nephini likamqeqeshi uVasili Manousakis.
Akuphelanga lapho njengoba iqembu lilandele ngokukhulula abadlali abangu-15, okukhona kubo izethenjwa okunguLuvuyo Memela, Augustine Mulenga noThabo Qalinge.
UJosephs ubeyingxenye yethimba labaqeqeshi elibeke Usuthu endaweni yesibili kwiDSTV Premiership ngesizini ka-2020/21. Usuthu ludlale esigabeni samaqoqo kwiCAF Champions League ngesizini ka-2021/22.
UZungu wabeka ukuboza kwabadlali njengesizathu esimenze waxoaha uBenni. UJosephs uthi yinsambatheka yonke leyo.
“Uma ubheka umsebenzi wami engiwenze nonozinti beqembu kulesizini, uyabona lukhulu ushintsho. Unozinti wami useqenjini lesizwe, ungenelwe amagoli amancane uma uqhathanisa nesizini edlule.
Angiboni ukuthi ngixoshelwe umsebenzi wami. Angisiboni isizathu sokuxosha kwami, ngisola ukuthi yingoba ngafika noBenni eqenjini. Besiyithimba likaBenni, ukuhamba kwakhe kusibeke ngaphansi kwengcindezi,” kusho uJosephs ekhuluma nabeSowetan.
UJosephs usola ukuthi iqembu likhulule inqwaba yabadlali kanye nethimba labaqeqeshi ngoba lizama ukunciphisa izindleko.
“Ngiyasola ukuthi indaba iqondene nesimo sezimali. Lokho ngiyakuqonda impela.
Angiqondi ukuthi abaphathi beqembu bacabanga kanjani ngoba icebo labo lonyaka ka-2032 belihamba ngendlela. Ukungena kwiChampions ngonyaka wokuqala kuyimpumelelo enkulu, bekufanele kube yisisekelo sokwakhela.
Bekuphoqa ukuthi kusayiniswe abadlali abasha ngesizini elandelayo kodwa akwenzekanga lutho. Angeke ngikhulumele abaphathi kodwa sengibeka uvo lwami ngoba ngididekile. Sixoshiwe kodwa sikwenzile obekufunwa iqembu.
Sikhuphule izinga leqembu, salifundisa ukunqoba, besiyiqembu elivika izembe iminyaka eminingi. Sixoshwe nje abalandeli sebeyajwayela ukuzigqaja ngeqembu balijabulele. Kuyangidida ukuxoshwa kwethu ngoba imiphumela ibigculisa,” kusho uJosephs.
UJosephs uyingxenye yohlelo lokufundela ukucika onozinti oludidiyelwa u-Alex Heredia weFIFA. Izifundo ziphothulwa eSAFA Technical Centre, eFun Valley, eGoli.