Umdlali weMarumo Gallants uNdabayithethwa Ndlondlo ukholwa ukuthi banethuba elikhulu lokuvikela isicoco sabo seNedbank Cup uma sebetholana neMamelodi Sundowns kowamanqamu ngoMgqibelo eRoyal Bafokeng Stadium.
IGallants isilwela ukuqeda isizini ngesizotha kwazise I sivele izibekisele ngendawo kumqhudelwano weCAF Confederations Cup ngesizini ezayo.
IGallants ishaye iSantos, Orlando Pirates, Baroka neTTM endleleni ebheke kowamanqamu.
Bazotholana neSundowns engagayelwa mphako kulesizini njengoba isinqobe iDSTV Premiership neMTN 8. UNdlondlo uthi likhona ithuba lokushaya iSundowns yize iyizimfivilithi. Uthembise ukuthi bazoyinikeza umdlalo iSundowns.
“Siwunqobile umdlalo wamanqamu ngonyaka odlule, sinelinye ithuba lokumuka nesicoco kulonyaka. Kungenzeka sinqobe. Kuyasigqugquzela ukwazi ukuthi singanqoba lendebe ihlandla lesibili kulandelana.
Akekho osinikeza ithuba. Kuhle lokho ngoba ingcindezi izohlala kwiSundowns, yibona ompetha beligi, kulindeleke ukuthi bawunqobe lomdlalo.
Kufuneka silwe ngempela kulomdlalo ngob sidlala neqembu elikhulu iNingizimu Afrika yonke,” kubeka uNdlondlo ekhuluma nabezindaba izolo.
Kulindeleke ukuthi ifomu kaNdlondlo ibe phezulu kulomdlalo ukuze iGallants izoba nethuba lokulwisana neDowns. Lomdlali uthi ulindele ukudlaliswa kanzima yiDowns ezobe imfakela ingcindezi.
“Bazofuna ukungifaka ngaphansi kwengcindezi. Lokho kuzosiza iqembu. Ukunaka mina kuzovusa abanye abadlali abangadlala izinkinga kwiSundowns,” kusho uNdlondlo.