Oyisikhulu esiphezulu seCape Town Spurs u-Alexi Efstathiou uthi isifinyelele esiphethweni indaba yabadlali abekade bekhala ngokugqunywa ngenkani kuleliqembu yize kunamaqembu abefuna ukubasayinisa.
Kubikwa ukuthi kunedlanzana labadlali elivuke umbhejazane kulandela ukudayiswa kukaRushwin Dortley osayine neKaizer Chiefs.
UChumani Butsaka, Asanele Velebayi, Liam Bern no-Ashley Cupido ngabanye abadlali beSputlrs abamataniswa namaqembu akuPSL njengoba bashaya into ecokeme ngesizini edlule.
U-Efstathiou usola umoya wezikhova kuma-agent afuna ukudayisa abadlali ngoba elangazelele inzuzo.
“Ngibachazelile abadlali ukuthi iChiefs isineminyaka emibili icathamela uRushwin, akuyona into eyenzeke ngokuphazima kweso.
“Abadlali abafunwa amanye amaqembu manje bebengaziwa eminyakeni edlule. Ukudayiswa kukaRushwin akusho ukuthi nabanye abadlali bazofakwa endalini, izinto azihambi ngaleyondlela. Ibhola libuye lifane nebhizinisi,” kuchaza u-Efstathiou ekhuluma nabezindaba.
U-Efstathiou uthi angeke bengamdedeli umdlali uma kubekwa imali egculisayo etafuleni. U-Efstathiou uthi amanye amaqembu abegcina ngokukhuluma, angayiphathi eyokubeka imali etafuleni.
“Indaba yamaqembu afuna abadlali ngiyibona ezinkundleni zokuxhumana. Kwenzekile ngaxoxisana namanye amaqembu kodwa agcina engashiyanga lutho etafuleni. Amanye amaqembu ngiwachithile ngisho esebeke imali.
“Angeke nginqabe ukudedela umdlali kodwa kufanele ngiyicubungule imali ebekiwe. Kufanele asheshise amaqembu ngoba iligi izoqala emasontweni amathathu. Enye ingqinamba ukuvalwa kwewindi, okudala ukuthi singakwazi ukudayisa abadlali.
“Kufanele ngibhekelele iqembu, ngingabheki abadlali abathize. Kukhona umdlali engimchazele lokho namuhla. Angeke ngitatazele ngoba sekukhuluma umdlali, iqembu lihamba phambili,” kusho u-Efstathiou.
U-Efstathiou ucebise abadlali ngokubaluleka kokuhlonipha umsebenzi noma bengajabule.
“Umdlali uyazinikela ngoba usuke ezoholelwa ngokwesikhathi asihlala eqenjini. Isivumelwano sichaza kanjalo. Abadlali kufanele bahloniphe umsebenzi ngoba isivumelwano sibatshela ukuthi benze kanjalo,” kubeka u-Efstathiou.