Umgadli weLiverpool uMohamed Salah uthi anganikela ngemiklomela ayinqobe kulonyaka ukuze ezophinda umdlalo wamanqamu we-UEFA Champions League neReal Madrid.
ILiverpool yashaywa iMadrid ngo 1-0 eStade de France yize yathola inqwaba yamathuba esiwombeni sokuqala.
ILiverpool yavinjwa unozinti uThibaut Courtois owayevala kwasani epalini. Wavimba amabhola angu-9, okuyirekhodi elisha kowamanqamu weChampions League kusukela ngesizini ka-2003/04.
Ukuhlulwa eFrance kwaqeda iphupho leLiverpool lokunqoba izindebe ezine kulesizini. AmaReds aqukula iFA Cup neCarabao Cup kuphela, kwazise neManchester City yabaleka nePremier League ngosuku lokugcina.
USalah waqoqa imiklomelo eyisithupha sekuphele isizini kwazise wayevutha engabaselwe. Wakhala wemuka nesicoco somshayimagoli ohamba phambili, umvusi wenyamazane ovelele negoli lesizini elivele. Waphinde wahlabana ngezindondo zomdlali ovelele ezisuka kwiFWA nePFA evotelwa abalandeli.
Akekho umdlali osondele kwirekhodi likaSalah kwiPremier League kulesizini. Ushaye amagoli angu-23, waba ngumvusi wenyamazane amahlandla angu-13.
USalah uthi ugcwele ukuzisola uma ecabanga ngomdlalo wamanqamu weChampions League.
“Ukuvotelwa abalandeli nezintatheli zebhola ngesizini eyodwa kuyinto eyikhethelo, angisoze ngakhohlwa.
Yonke lemiklomelo ngingayibusela emuva ukuze ngizothola ithuba lesibili lokudlala neReal Madrid, kodwa ibhola alisebenzi kanjalo.
Angeke ngichaze ukuthi bengiyifuna kanjani iChampions League kodwa sihlulekile ukubuya nayo. Ngiyabonga kubalandeli a baqhubekile nokweseka iqembu. Isizini idonsile kodwa sengifisa ukuthi kuqalwe enye isizini kusasa,” kusho uSalah.