Umqeqeshi we-Orlando Pirates uJose Riveiro uthi iyodwa into esomqondweni wakhe njengamanje; ukubeka iqembu kuma-semifinal, ngakho akafuni ukuxakwa ngemibuzo ngekusasa lakhe njengoba sekumenyezeliwe ukuthi uyahamba kweZimnyama ekupheleni kwesizini.
IPirates izobhekana neMC Alger emlenzeni wesibili namhlanje e-Orlando Stadium ngo-18:00. Ziphathe kabi abalandeli abaningi izindaba zokuthi ngeke ayelule inkontileka yakhe kwiPirates uRiveiro.
Nezintatheli zilokhe zimxine njalo ngemibuzo ngekusasa lakhe njengoba kuthiwa kunamaqembu amfunayo eSaudi Arabia nakwezinye izindawo.
“Kulezi nsuku ngicabanga ngokufanele sikwenze uma sesibhekene neMC Alger ukuze sifinyelele kuma semi-final. Ilokho okuyisifiso sethu.
“Kusukela ngosuku lokuqala ngifikile besilwela ukudlala imidlalo efana nalena, ukuqhudelana nezinkunzi zase-Africa, sesicabanga ngomdlalo olandelayo. Sifuna ukuwina wonke umdlalo; nomdlalo weNedbank Cup nawo sifuna ukuwunqoba. Yilokho nje.
“Ukucabanga ngami nangekusasa lami ngeke kusisize, njengamanje ngicabanga ngomsebenzi ophambi kwami.”