UKemiso Motaung, oyi-head of digital kwiKaizer Chiefs usekuqinisekisile ukuthi iqembu labesifazane lizosungulwa ingakapheli isizini ka-2021/22.

UKemiso uqinisekise lezindaba ekhuluma ohlelweni lweGame Time kuRadio 2000 ngoLwesithathu.

Uthe iChiefs ibhekene nezingqinamba eziningi izama ukubumba iqembu labesifazane.

“Sekuphele isikhathi eside sikhuluma ngaloludaba. Bekukhona izingqinamba ebesibhekene nazo mayelana nokusungula iqembu labesifazane.

Njengoba uMqondisi wezemiDlalo (Kaizer Motaung Jnr) ebekile, iqembu labesifazane lizokwethulwa ngokusemthethweni kulesizini,” kubeka uKemiso.

IMamelodi Sundowns iyona kuphela eneqembu labesifazane emaqenjini amadala eNingizimu Afrika. Isinqobe iligi amahlandla amane, okubalwa kuwo iHollywoodbets Super League ngo-2020 nango-2021. ISundowns yaphinde yanqoba iCAF Women’s Champions League ngo-2021.

Impumelelo yeBanyana Banyana kwi-Africa Women’s Cup of Nations (WAFCON) izogqugquzela amaqembu ukuthi asungule amaqembu abesifazane.

Umthetho weConfederation of African Football (CAF) uzogcina usuphoqa amaqembu ukuthi asungule amaqembu abesifazane uma ezimisele ngokudlala kwiCAF Champions League neConferedations Cup.