Isiteshi sikamabonakude esizimele, uMzansi Magic, sesikhiphe isimemezelo ngokuqedwa komdlalo iGqeberha: The Empire okhonjiswa njalo maphakathi nesonto ngehora lesishiyagalolunye ebusuku (21:00).
Lomdlalo, ozohlanganisa iziqephu ezingu-520 uma sekuphothulwe isizini yesibili, uzogcina ukubonakala ngonyaka ka-2025.
Kuvela ukuthi lomdlalo, odidiyelwa abeTshedza Pictures, ubungenzi kahle uma kuziwa kubabukeli.
Umdlalo Umkhokha:The Curse, okhonjiswa ngehora lesishiyagalombili, udonse izinkumbi zababukeli abangu-1 million. IGqeberha ikhale ngaphansi ngababukeli abangu-620,154.
UShirley Adonisi, onguMqondisi kuM-Net ubeke kanje:
“Sidlulisa ukubonga kubadidiyeli, abalingisi nakubasebenzi beGqeberha: The Empire. Bakhombise ithalente eliyisimanga ngeziqephu ebezikushiya ufuna impinda esikhaleni esigaqelwe imidlalo eminingi.
“Njengoba umdlalo usuyela emaphethelweni, sikulindele ngabomvu ukubukela isiphetho somdlalo owuchungechunge,” kusho u-Adonisi esitatimendeni.
U-Adonisi ubonge nohulumeni wase-Eastern Cape ngokuxhasa abadidiyeli bomdlalo selokhu kwaqala ukushuthwa ngoJanuwari wango-2021.
Isiphetho somdlalo sizogqamisa uHlumelo, ongomunye wabalingisi abaqavile, ecela usizo kubantu abahlukumeza.
Lomdlalo uke waba sematheni ngaphambilini kuvela izindaba zokuthi abalingisi abeneme. Izikhalo zabalingisi bezithinta izindawo zokuhlala nokuxoshwa kwabanye ngaphandle kwezizathu eziqondile.
Kuvela ukuthi sekukhona omunye umdlalo ozovala isikhala seGqeberha: The Empire.