I-UEFA isishayele isigxiviso sokugcina mayelana nokushintshwa kwesigaba samaqoqo kwiChampions League ezoqala ngesizini ka-2024/25.

Isibalo samaqembu sizonyukela ku-36, okuchaza ukuthi kuzokwengezwa ngamaqembu amane. Nesigaba samaqoqo sizoshintsha imbala, angeke kusahlelwa amaqoqo angu-8 anamaqembu amane njengenjwayelo.

Esigabeni esisha kuzofakwa wonke amaqembu etafuleni elilodwa, ashayane aze abukane.

Iqembu ngalinye lizobhekana namaqembu angu-8 ahlukene, okuyimidlalo ezobanjelwa ekhaya nasekuhambeni. Ngokujwayelekile, iqembu belidlala amahlandla ayisithupha esigabeni samaqoqo, kube imidlalo emithathu esekhaya, eminye esekuhambeni.

Amaqembu aqede esendaweni yokuqala kuze kufike kunombolo 8 azodlulela esigabeni somkhumulajezi. Amaqembu aqede kunombolo 9 kuya ku-24 azobhekana emidlalweni ezoba yimilenze emibili ukuze ezongena kwi-last 16.

Amaqembu aqede kunombolo 25 kuya ezansi azowasha ijezi.

Lezinguquko zizosebenza ngisho kwi-UEFA Europa League neConference League. Kwi-Europa League, iqembu ngalinye lizodlala imidlalo engu-8. KwiConference League, iqembu ngalinye lizodlala eyisithupha.

Yomibili imiqhudelwano izosintshwa kwenziwe itafula elinamaqembu angu-36.