Sekuvele okubambezela ukumenyezelwa kwabanikazi abasha beRoyal AM okwakuthiwe bazovezwa ngoMsombuluko odlule ngemuva kokudayiswa kweqembu ngoMarch 14.
Ukungamenyezelwa kwabanikazi abasha beqembu kungase kuphazamise ukuqhubeka kweligi njengoba kungacaci ukuthi kuzomiswa kanjani ngenqwaba yemidlalo okusamele idlalwe yiThwihli Thwahla. Bekunenkolelo yokuthi kuzophuthunyiswa ukudayiswa kwayo ukuze kuzoqhubeka imdlalo ngokushesha.
Ngokwenkampani egxile ebhizinisini lezemidlalo, iCash N Sport, okubambezele manje yizingxoxo neNSL yePSL okuyiyo ezophasisa ukudayiswa kweqembu.
“Sekuqediwe ngesamba sokuthenga iqembu, sikhokhiwe. Imali ifakwe kwi-trust account, kulindwe ukuthi iNSL iphasisie. Uma ingaphasisi iNSL, imali izobuyela emuva,” kusho iCash N Sport ku-X.
Uma isiphasisile iNSL, umnikazi omusha uzothatha konke okuthinta iRoyal AM okubalwa kukho nezikweletu zeqembu, njengamali okusamele ikhokhelwe uSamir Nurkovic.