IMM Platinum (La Masia) iyona edle umhlanganiso kumaPlay-Offs e-ABC Motsepe League ishaya iMagesi ngo 1-0 kowamanqamu e-Olen Park, ePotchefstroom ngeSonto emini.

Womabili amaqembu abeseqedile ukuzibekisela ngezindawo kwiGladAfrica Championship ngesizini ka-2022/23 njengoba efinyelele kowamanqamu.

Kuyiwe ekhefini zibambene ngeqanda e-Olen Park, womabili amaqembu engafiki emapalini kakhulu.

Igoli leLa Masia lingene ngomzuzu ka-74, uSipho Mahlangu eqedela ibhola abeliphaselwe uSheldon Van Wyk.

Yize iMagesi izamile ukushaya igoli lokulinganisa umdlalo usuyophela, unozinti weMM Platinum uSidingo Nxumalo ubengagayelwe mphako emapalini.

IMM Platinum, eqeqeshwa uDalano Hendricks no-Ashraf Hendricks ngokubambisana, ayikaze ingenelwe yigoli emidlalweni emine kumaPlay-Offs.

Ompetha iMM Platinum bahlabane ngo-R1 million, iMagesi yathola u-R600,000.