Kungenzeka ithole upotsho wokubuya kwiGladAfrica Championship iJomo Cosmos uma kwenzeka ukuthi ikomidi eliqondisa izigwegwe kwiPremier Soccer League liqoka ukuphuca iHungry Lions amaphuzu.
IHungry Lions izovela phambi kwekomidi eliqondisa izigwegwe ngoMsombuluko, umhlaka 27 kuJuni ngehora lesihlanu ntambama.
Leliqembu lisolwa ngokusebenzisa umdlali owayengavumelekile ukudlala kwimidlalo yeligi uTshepo Mohlala. UMohlala wadlala emidlalweni elishumi.
IHungry Lions ibekwe icala lokuphula umthetho ka-32,2 no 32.3 weNational Soccer League (NSL).
ILions iphinde yagixabezwa icala lokungcolisa igama leligi, abaxhasi, umdlali, amalungu eligi, SAFA, CAF neFIFA okuwumethetho ka-55,3,13 weNSL.
UMohlala useke wadlalela iqembu lama-amesha leCosmos ngesizini ka-2015/16.
ILions yaqoqa amaphuzu angu-15 kulemidlalo eyasebenzisa kuyo uMohlala. Uma itholakala inecala, kungenzeka iphucwe amaphuzu igcine isiyehlela kwiSAFA ABC Motsepe League. Lokho kungaqinisekisa ukubuya kweCosmos kwiGladAfrica kwazise yadliwa yizembe kulesizini ephelile.
ICosmos yehlela kwi-ABC Motsepe League ngemuva kokuqeda kunombolo 15 ngamaphuzu angu-28.
ILions yaqeda kunombolo 11 ngamaphuzu angu-36. Uma begcina bephucwe amaphuzu, iLions izobamba amabhuleki kwiNFD ngamaphuzu angu-23.