Iqembu eliphekwa wuGavin Hunt, iSuperSport United, libukeka selizifake obishini lokungcweka nezembe sekubhekwe emaphethelweni esizini ka-2024/2025.
Amatsatsantsa axetshulwe yiTS Galaxy ngo 3-1 emdlalweni weBetway Premiership izolo okuwashiye kunombolo 13 etafuleni. Ngemuva kwabo kukhona iMagesi isele ngephuzu kubo, Marumo Gallants esele ngamaphuzu amabili nemidlalo emibili esandleni, neRoyal AM enemidlalo ewu-11 esandleni njengoba imisiwe.
Okwenza sibone iSuperSport ingase ingene engozini yezembe wukuthi amaqembu angaphansi kwayo, ngaphandle kweRoyal AM, akhombisa ukuthi asempini njengoba eqoqa amaphuzu kangcono muva nje kunangaphambalini.
Abadlali abaningi kwiSuperSport abanawo amava okudlalela ukuvika izembe ngakho kuzoyisiza ukuthi ibalekele indawo ekuyo ngokushesha. Emdlalweni emihlanu edlule ezikaHunt ziqoqe amaphuzu amahlanu kuphela.
Okuzokhathaza lo mqeqeshi wukuthi ezakhe ziyavuza emuva kule sizini njengoba sezidedele amanqaku awu-22 emdlalweni ewu-21, kanti azikori amagoli anele naphambili, okuyicombo evame ukuholela ezembeni.
ISuperSport izothola ithuba lokuphumula kule mpelasonto njengoba bekufanele ibhekane neRoyal AM. Isiyoze idlale ngoMarch 30 emdlalweni wayo neCape Town City nayo ezoqala ukukhathazeka ngokuhluleka ukuqoqa amaphuzu muva nje.