Sphamandla Gumede

“Ukuphuma kukaMakola ngekhadi elibomvu bekumele kusisize kodwa sihlulekile ukusebenzisa lelothuba.”

Lawa ngamazwi omqeqeshi we-Orlando Pirates uJosef Zinnbauer ebuzwa abeSuperSport TV ngemuva komdlalo ezakhe zishaywa iCape Town City ngo 1-0 izolo ntambama.

UKermit Erasmus ushaye igoli elinqobise iCity e-Ellis Park. ICityzens iqede umdlalo ingaphelele njengoba umdlali wasesiswini uMpho Makola ethole ikhadi elibomvu ngesiwombe sokuqala.

“Besiwuphethe umdlalo, sathola amathuba amaningi okushaya amagoli kodwa sahluleka ukuwasebenzisa. Ukuphuma kwekhadi elibomvu kushintshe izinto eziningi. Bekumele sisebenzise lelothuba kodwa sihlulekile. Sitshele abadlali ukuthi bakhuphule amasokisi kodwa izinto zigaya ngomunye umhlathi enkundleni. Bekunzima ukuthi sithole amaphuzu kulomdlalo,” kubeka lomqeqeshi.

IBucs ibiqeda umdlalo wesithupha ingakaze iwine kwi-Absa Premiership. EzikaZinnbauer zidlale ngokulingana neBaroka, iBidvest Wits neMamelodi emidlalweni odlule. Ukushaywa iCityzens kushabalalise wonke amathemba okunqoba iligi njengoba iBucs isihleli endaweni yesihlanu.

“Silwile ngesiwombe sesibili, besifinyelela ebhokisini kodwa sahluleka ukushaya amagoli. Ngeke uwine uma ungalishayi igoli. Kunzima ukuwina uma udlala neqembu elipaka ibhasi, elingafuni ukuhlasela. Sidlale kahle kodwa ibhola linjalo. Besidlala nabantu abashodayo kodwa asiwinanga. Mhlawumbe besizowashaya amagoli kodwa isikhathi besingenaso. Ngiyayibongela iCity ngokudlala kwayo,” kubeka uZinnbauer.

IBucs izofuna ukubuyisa izinduku uma isibhekana neSuperSport United ngoMgqibelo e-Ellis Park.