IGibela Sport isithole ngomthombo wayo ukuthi isengcupheni yokubhuntsha indlela kaRuzaigh Gamildien ebheke kwiRoyal AM.

UGamildien ubenesivumelwano neRoyal AM kusukela maphakathi nesizini. Iqembu abedlala kulo iSwallows yafungela isivumelwano sokudayisa uGamildien, Dillan Solomons noKhethukuthula Ndlovu kwiThwihli Thwahla uma sekuphele isizini.

Indaba yabadlali yayiphakathi kweSwallows neRoyal AM, abadlali abakaze bavume ukujoyina iRoyal AM.

Njengoba iKaizer Chiefs yethule uSolomons njengomdlali wayo omusha ngoMsombuluko, kuvela ukuthi iThwihli Thwahla isihoshsa izinyawo ngokusayinisa uGamildien.

Oyisikhulu esiphezulu kwiRoyal AM uSinky Mnisi waveza ukuthi kungenzeka alwisane nokusayiniswa kukaSolomons ePhefeni.

Ekhuluma no-Andile Ncube ohlelweni lweSports Nights Amplified ngoLwesibili, uSolomons wabeka kanje:

“Kunodaba olukhulu oluzayo. Angiyibeke kanjalo okwamanje. Indaba iqondene noSolomons. Kodwa ngizoyekela indaba kubaphathi beqembu.

Landela loludaba ngokucophelela. IRoyal AM nayo ikhona odabeni. Uma selukhulunywa udaba, uzowakhumbula amazwi ami. Kungenzeka umdlali wethulwe iChiefs kodwa kunemigomo emgalandelwanga kahle. Ngizothula okwamanje,” kubeka uMnisi.

IGibela Sport ithole ukuthi iSwallows yavuma ukudayisa uSolomons, Gamildien noNdlovu kwiRoyal AM kodwa abadlali abakaze basayine phansi izivumelwano. Lokhu kuchaza ukuthi isivumelwano samaqembu sasingaqondile kahle.

Kungenzeka ibhuntshe indaba kaGamildien uma iRoyal AM iqoka ukushintsha izinhlelo njengoba sekunomdlali ongasekho ngokwesivumelwano sabo.