Umehluleli wePremier Soccer League (PSL) uZola Majavu usebeke iCape Town City icala lokusayina isivumelwano nabaxhasi abasha okungabakwaFirst National Bank ngaphambi kokuthola imvume ekomidini elikhulu lePSL.
ICity nePSL abavumelani ngodaba lwabaxhasi abasha, abamenyezelwa iCity ngomhlaka 1 ku-Agasti.
IPSL ikhala ngokuthi abakwaFNB akufanele baxhase iCity ngoba iligi ixhaswe abakwaNedbank abadidiyela umqhudelwano wenkomishi iNedbank Cup.
“ICape Town City ibeke icala lokuhluleka ukuthola imvume kwikomidi eliphezulu lePSL, okuwumthetho ofungelwe mayelana nokuxhaswa ibhange.
Ngokomthetho, iCity bekufanele ithole imvume kwiPSL kuqala ngaphambi kokuqedela isivumelwano nabaxhasi abasha. Kuloludaba, iCity ihlulekile ukudlulisa umyalezo kwiPSL, yazenzela ngendlela yayo.
Bazovela phambi kwekomidi eliqondisa izigwegwe ngomhlaka 22 Agasti (uMsombuluko). Ukuqulwa kwecala kuzoqala ngehora lesithupha ntambama,” kubeka uMajavu esitatimendeni.
UMajavu uthe iSwallows isibekwe icala lokumisa okwesikhashana umdlalo weligi neCape Town City. Umdlalo wanqotshwa iSwallows ngo 3-2 ngomhlaka 9 Agasti eDobsonville Stadium.
“ISwallows ibekwe icala lokumisa okwesikhashana umdlalo neCity, yaphinde yenza izinguquko ephepheni lesikimu ngaphandle kokukhuluma neqembu eyayidlala nalo nethimba lonompempe, okuwumthetho obhaliwe.
ISwallows izoziphendulela phambi kwekomidi eliqondisa izigwegwe ngoLwesine,” kubeka uMajavu.