Iphuzu elilodwa kwiCape Town Spurs liwelisele iRichards Bay kwiDSTV Premiership, yasala incinda iminwe i-University of Pretoria (TUKS) eqede isendaweni yesibili.
Umdlalo uphele zigingqa iqanda zombili eKing Zwelithini Stadium.
AmaTUKS kanye neCape Town All Stars esendaweni yesithathu, bazodlala kuma-playoffs okukhuphukela kwiDSTV Premiership. Iqembu elizobajoyina lizoqinisekiswa emzuliswaneni wokugcina weligi ngesonto elizayo.
IBay imincele ukuthi amaTUKS abhacaze komunye umdlalo ukuze izonyukela esigabeni esiphezulu. AmaTUKS adlale neHungry Lions, umdlalo waphela ngo 0-0.
IBay ibidinga amaphuzu amathathu ukuze izoqeda ngeligi, umphumela womdlalo wamaTUKS ubungeke usanakwa. Uma kuyiphuzu elilodwa elitholwe iBay, bekuphoqa ukumincela umphumela ozoyivuna emdlalweni wamaTUKS.
IBay ijabulise abalandeli bayo kulesizini kwazise ngokudlule yahluleka ukuqeda ngesicoco iligi isizophela.