Ibhekene nesambane iBayern Munchen ezama ukuncenga isethenjwa somgadli uRobert Lewandowski ukuthi ahlale eBavaria.
NgoMgqibelo, uMqondisi wezemiDlalo kwiBayern uHasan Salihamidzic uqinisekise ukuthi uLewandowski usecele ukuhamba kuleliqembu.
Lomgadli udalule ukuthi usefuna amadlelo aluhlaza kwelinye iqembu njengoba esehlale iminyaka engu-8 eBavaria.
Ivelile imibiko ngoLewandowski ezinsukwini ezedlule kodwa uSalihamidzic ugcine evumile kwinkulumo abeyibambe nabeSky Sports.
IBayern ishaye phansi ngonyawo, yamtshela emehlweni lomgadli ukuthi usanenkontileka ezophela ngesizini ezayo. Kubukeka zizodonsa izinyanga ezilandelayo njengoba iBayern izobe izama ukuncenga ozifunela ukuya kwiBarcelona.
Yize kuyimfihlo esobala ukuthi uLewandowski ufunwa yiBarcelona, umqeqeshi wayo uXavi unqabile ukuphumela obala ngoMgqibelo.
USalihamidzic uchaze ngenkulumo ayibambe nalomgadli oqede lesizini engumshayimagoli ohamba phambili.
“ULewandowski uthe usefuna ukuhamba. Isinqumo seqembu asishintshile. ULewandowski unenkontileka ephela ngoJuni wango-2023. Iqiniso linjalo.
Ngikhulumile naye uLewandowski. Ungitshelile ukuthi angeke avume ukusayina inkontileka esimnikeza yona, ufuna ukuhamba eqenjini,” kubeka uSalihamidzic.
USalihamidzic ubuzwe ngemizamo yokuncenga uLewandowski, waphendula ngokuthi iqembu lisamile ezwini lalo.
Lesimemezelo siphume ngaphambi komdlalo weBundesliga phakathi kweBayern neWolfsburg. ULewandowski ushaye igoli elilodwa kulomdlalo iphele ngo 2-2. Uqede lesizini eseshaye amagoli angu-50 uma kuhlanganiswa iligi, DFB Pokal ne-UEFA Champions League.