Baphinde basala bencela izithupha abalandeli beKaizer Chiefs ezabo zishaywa yiYoung Africans SC ngo 4-0 koweToyota Cup eFree State Stadium ngeSonto ntambama.

IYanga ikore ngomzuzu ka-25 umgadli waseZimbabwe uPrince Dube evalela igoli abadlali beChiefs besahuqa ubuthongo ebhokisini ngemuva kwe-free kick.

IChiefs izamile ukubuya kulo mdlalo, uRanga Chivaviro uke wathola ibhola elihle ebhokisini kodwa wahlulwa yinto yokuqala (first touch), laxoshwa emuva ebhola.

Ngemuva komzuzu ka-40 uMfundo Vilakazi udedele ishodi elihle ezwa unozinti weYanga, kodwa ubemi endaweni enhle ukuthi alinqake kalula ibhola. IChiefs ibukeke isikhuphula igiya sekubhekwe ekhefini kodwa akuyisizanga njengoba ingalitholanga igoli.

Umdlali osemncane weChiefs obeyibambe ku-left back uNkosana Mbuthu, ovela kwi-reserve team, wenze iphutha eliholele kwigoli lesibili leYanga elikorwe wu-Aziz Ki. UMbuthu uhluleke ukuxosha ibhola kalula, kunalokho wazama ukuphasa, lathathwa ibholwa lafakwa ebhokisini, kwathiwa hlaba udle Ki.

Amakhosi aqhubekile nokufaka ingcindezi kwiYanga, ikakhulukazi ngama-cross, kodwa alikho ithuba elitheni elakhile ngaphambi kokuthi kuyiwe ekhefini.

Kaizer Chiefs Starting XI: Petersen, Frosler, Ditlhokwe, Msimango, Mbuthu, Maart ©, Zwane, Shabalala, Vilakazi, Du Preez, Chivaviro

Esiwombeni sesibili uNabi ushintshe izinto ekhipha uChivaviro, kwangena uNkosingiphile Ngcobo. Ithe ukudlala kangcono imizuzuwana esiswini iChiefs kodwa yaphantsha uClement Mzize evalela igoli lesithathu ngomzuzu ka-57.

Kuphinde kwenzeka elinye iphutha uKi wavelela igoli lakhe lesibili ngomzuzu ka-63.