Umqeqeshi weMamelodi Sundowns uManqoba Mngqithi usephumele obala, wabeka ukuthi iKaizer Chiefs ne-Orlando Pirates angeke ibanikeze inkinga kwiDSTV Premiership ngesizini ka-2022/23.
UMngqithi ukhulume kanje emcimbini wokwethula isizini ka-2022/23.
ISundowns iyona engabavikeli beDSTV Premiership, MTN 8 neNedbank Cup, okuyizindebe abazinqobe zontathu ngesizini edlule.
IChiefs nePirates basale bencela izithupha bebukela iSundowns ishanela zonke izindebe. Womabili lamaqembu ahlulekile nokuhlala ezithendeni zeDowns kwiligi.
IChiefs iqede endaweni yesihlanu, iBucs yazabalaza endaweni kweyesithupha.
“Kukhona amaqembu okusafanele alwele ukukhuphula kwiligi, azohlaba endaweni yesithathu. Lamaqembu aqede endaweni yesihlanu neyesithupha,” kubeka uMngqithi.
UMngqithi ukhombe iCape Town City kanye, Stellenbosch FC neRoyal AM njengamaqembu azobanikeza inkinga kwiligi.
“Amaqembu ancintisana nathi yiCape Town City, Stellenbosch neRoyal AM. Yiwona lamaqembu azosinikeza izinkinga, adlala kahle uma ubheka amasizini adlule. Ngilindele ukuthi asinikeze inqwaba yezinkinga.
Ngiyabona ukuthi iPirates isayinise abadlali abaningi abasezingeni neChiefs nayo iqinise isikwati ngabadlali abaseqophelweni. Ngiyakuqonda ukuthi kudingeka isikhathi eside ukubumba iqembu uma lisagcwele abadlali abasha,” kubeka uMngqithi.
Amaqembu aseSoweto azoqala lesizini ngabaqeqeshi abasha.
UJose Riveiro uzobe ehola iPirates, u-Arthur Zwane useqeqesha iChiefs.
ISundowns izovula iligi neCape Town City ngomhlaka 5 ku-Agasti. Umdlalo uzobanjelwa eCape Town Stadium.