IKaizer Chiefs isiqale izingxoxo neStellenbosch FC mayelana ngokusayinisa umgadli wayo u-Ashley Du Preez.
Okwamanje, asikho isivumelwano phakathi kwalamaqembu.
IChiefs inesikhathi eside ilandela uDu Preez oseshaye amagoli angu-9, wakhanda amagoli amathathu kwiligi.
IStellenbosch inombandela kwinkontileka kaDu Preez ophoqa amaqembu ukuthi akhokhe imali eyisizumbulu uma efuna ukumthenga. IStellies yasebenzisa lombandela ihlehlisa iChiefs eyayicathamela lomgadli ekuqaleni kwesizini.
Kuvela ukuthi iChiefs iphinde yangqongoza emnyango weStellies ngoMsombuluko, izokhuluma ngoDu Preez. Yize iGlamour Boys igcine ivumelene neStellenbosch ngokuthenga uZitha Kwinika, kubukeka kuzoba nzima ukusayinisa uDu Preez.
Yize kusabalele imibiko ekhomba lomgadli kwiChiefs, asikho isivumelwano phakathi kwalamaqembu. IChiefs izimisele ngokukhokha imali, ifake nomdlali ngaphezulu ukuze izoheha iStellies.
Kuvela ukuthi iStellies singajabula uma singathola uHappy Mashiane kwiChiefs. Amakhosi anqaba noMashiane ekuqaleni kwesizini kodwa asekulungele ukumnikeza leliqembu laseKapa.
IStellenbosch asifuni ukucacisa ngoMashiane njengoba sekukhona abadlali abasuka kwinkulisa abazimisele ngokulwela izindawo ngesizini ezayo.