Umqeqeshi weKaizer Chiefs u-Arthur Zwane uthi yize iqembu lisakhandwa kabusha njengoba esethathe izintambo, ukunqoba izindebe kulesizini kusewumgomo abazibekele wona.
UZwane ubeke kanje ekhuluma nezintatheli emcimbini wokwethulwa kwesizini ka-2022/23 obubanjelwe eRandburg ngoLwesine.
“Yize iqembu lisakhandwa kabusha, sifuna ukunqoba izindebe. IChiefs iyiqembu elinomlando omkhulu, sinesiko lokunqoba. Angeke siqale isizini sizitshela ukuthi siyakhanda. Imiphumela iyafuneka, noma ngabe siyakhanda,” kubeka uZwane.
IChiefs izoqala lesizini ingaphansi kwengcindezi njengoba isiqede iminyaka eyisikhombisa ingakaze inqobe neyodwa indebe.
IGlamour isayinise abadlali abayisikhombisa, yadedela inqwaba njengoba ifuna ukujika izinto kulesizini. Amakhosi asayinise uZitha Kwinika, Dillan Solomons, Siyethemba Sithebe, Yusuf Maart, Kamohelo Mahlatsi, Lehlogonolo Matlou nomgadli u-Ashley Du Preez.
UZwane uthi abadlali abasha sebengenile egiyeni, usethemba ukuthi bazoqala isizini ngenothi eliphezulu.
“Abadlali abasha sebengenile egiyeni, lokho kuyangijabulisa. Sisazama ukuthola izindlela zokubumba iqembu nokuhlanganisa abadlali ukuze bezosheshe beqonde indlela esidlala ngayo eqenjini.
Sifuna ukusizana, bonke abadlali kufanele basize labo abazobe bedonsa kanzima. Kubalulekile ukusizana ngoba kuzoqinisekisa ukuthi banyusa izinga emidlalweni.
Izinto zihamba kahle kodwa sizobona emdlalweni wokuqala. Umdlalo wokuqala yiwona ozocacisa izinga labadlali nezindawo esishoda kuzo,” kubeka uZwane.