IKaizer Chiefs iyaqhubeka nezinhlelo zokubumba isikwati kabusha njengoba isibheke isizini ka-2022/23.
IChiefs ithumele isicelo kwiRadomiak Radom yasePoland, ifuna ukuthenga uCele. Kuvela ukuthi iChiefs ibeke u-R1.67 million etafuleni.
UCele (25) wayesesondele ekujoyineni Amakhosi ngesizini eyedlule, wajika ekugcineni eseqoka ukudlalela iRadom.
IGlamour Boys isiqale phansi ngokucathamela lomdlali. Intatheli yasePoland uSzymon Jancczyk ibike ukuthi iChiefs ibeke u-€100 000 ifuna lomdlali.
Kuphinde kwavela ukuthi iRadomiak isichithile isicelo seChiefs ngoba umqeqeshi omusha weqembu uMariusz Lewandowski ubona uCele eyingxenye yezinhlelo zakhe.
UCele ufike ePoland esuka kwiCova Piedade yasePortugal. Udlale imidlalo engu-13 kulesizini.