I-Orlando Pirates isiqale izingxoxo nemenenja kaVictor Letsoalo weRoyal AM.

IBucs iqhamuka ngemuva kwezimbangi iKaizer Chiefs emfuna uthuli lomgadli kodwa iyala ukukhokha u-R20 million ofunwa yiqembu lakhe.

IBucs ibingakaze ibeke imali etafuleni njengoba ibuze kwimenenja ngesimo somdlali eqenjini.

Ekuqaleni kwesizini ka-2021/22 uLetsoalo ufake incwadi yokushiya kwiRoyal AM kodwa izikhulu zangafuna ukumdedela. IPirates ifuna lomgadli nje isanda kudayisa uGabadihno Mhango ojoyine AmaZulu.

ULetsoalo ukubeke obala ngesizini ephelile ukuthi engajabula ukuyodlala eqenjini elikhulu kuleli uma kuvela ithuba.

Lomdlali ulale isibili kuPeter Shalulile embamgweni womshayimagoli ohambe phambili kulesizini. Ushaye amagoli angu-14 kwiligi.