I-Orlando Pirates ihlela ukubolekisa ngomgadli uTshegofatso Mabasa osebhekwe amaqembu amabili kuDSTV Premiership.
IBucs imatasa kulezinsuku ihlela isikwati sangesizini ka-2022/23. Iqale ngokuchitha abadlali abayisithupha, okukhona kubo uKwanda Mngonyama, Wayne Sandilands, Elson Sithole, Thabang Monare, Abel Mabaso noJustice Chabalala.
UMabasa naye ungomunye wabadlali abazovula isikhala eqenjini njengoba sekusayiniswe abanye abagadli uBienvenu Eva Nga no-Evidence Makgopa.
UMabasa ugaqelwe omakoti beDSTV Premiership iRichards Bay kanye neSekhukhune United.
Lomgadli ushaye amagoli amathathu ngesizini ka-2021/22 nakhona ubengena esuka ebhentshini.
Ngesizini ka-2020/21 lomgadli ushaye amagoli angu-8, waqokelwa esikwatini sikaHugo Broos owaphetha ngokumgxeka bukhoma. Umqeqeshi weBafana wasola uMabasa ngokuboza.
IBucs imemezele abadlali abayisikhombisa abasha izolo, okugqame kubo uTapelo Xoki, Nkosinathi Sibisi, Miguel Timm, Eva Nga, Makgopa no-Azola Matrose.
IBucs isiqedile ngodaba lokubolekisa uMabasa, sekushoda avumelane neqembu azobolekiswa kulo.
Omunye umdlali ohambayo eMayfair uLinda Mntambo okhonjwa kwiSekhukhune United.