UCollins Makgaka ungomunye wabadlali abazochithwa yi-Orlando Pirates njengoba sekuphele isizini ka-2021/22.
UMakgaka (25) ulizwa ngendaba ijezi selokhu wafika eMayfair ngo-2020 esuka kwiBaroka. Kuvela ukuthi UMakgaka uzimisele ngokuthola iqembu elisha elizomnikeza ithuba lokudlala.
Intatheli yeGibela Sport izizwele kumthombo ongaphakathi eqenjini ukuthi izingxoxo zokudedela uMakgaka seziqaliwe, kulindeleke ukuthi aphume nesinxephezelo kwiBucs.
Nowayengukaputeni weBafana Bafana uThulani Hlatshwayo udedelwe iPirates ngoLwesihlanu ngemuva kokuthola isivumelwano neqembu. Naye uHlatshwayo ubelizwa ngendaba ijezi.
UMakgaka udlale emidlalweni engu-9 kuphela kulesizini. Ukhuhla ibhentshi nje bekulindelwe lukhulu kuye efika kwiBucs.
Kubukeka angeke antunte nendishi uMakgaka uma ededelwa kwiBucs kwazise sekukhona izesheli ezilinde isimemezelo.