Usihlalo wePSL u-Irvin Khoza usephumele obala waveza ukuthi iBetway izobaxhasa ngoR900 million eminyakeni emithathu ezayo. Lokhu kushi ukuthi iBetway izofaka uR300 million isizini ngayinye.
UKhoza uveze lokhu ngemuva kokumezela iBetway njengabaxhasi abasha beligi kulandela ukuhlukana neDStv, ezoqhubeka ibambisane nePSL kwezinye izinto.
Ebuzwa ngemali efakwe yiBetway uKhoza uqale waphendula ngokuthi: “uyayithanda imali ne?”
“IBetway izosixhasa iminyaka emithathu ngoR900 million.”
Uthe ngeke amemezele okwamanje ukuthi iqembu elizowina iligi lizohamba nomalini.
UKhoza uqhube waveza ukuthi kube nezingxoxo ezinde neHollywoodbets nayo ebizimisele ngokuxhasa iligi, wangabe esaveza ukuthi yini egcine ikhiphe iBetqway phambili.
Ubuziwe nangokungena kwenkampani yokubheja, njengoba kwaziwa ukuthi iPSL phambilini ibingazimisele kangako ukusebenza nezinkampani zokugembula.
UKhoza uthe izikhathi sezishintshile.
“Uzokhumbula ukuthi iGolden Arrows ixhaswe yinkampani yokugembula. IKaizer Chiefs nePirates nabo sebexhaswe yinkampani yokugembula. Uma sikwazi ukuvumelana nezinkampani, zihambisana nemithetho yePSL, kuyasebenzeka.”
Isikhulu seBetwat ebesihambele lesi simemezelo siveze ukuthi bafuna ukuzoqinisa icontent yePSL, bayithathe bayibeke kwelinye izinga.
Khonamanjalo, uKhoza uphinde wamemezela ukuthi iligi izoqala ngo-August 3. Imidlalo yeligi izoqala ngoSeptember 10.